မီးယပ်သွေးဆုံးပြီး နောက်ဆက်တွဲဘာတွေဖြစ်လာနိုင်သလဲ ?

မီးယပ်သွေးဆုံးပြီးနောက် အမျိုးသမီးတွေတွေဟာ အောက်ပါ ကျန်းမာရေးအခြေအနေတွေ ကြုံတွေ့ရနိုင်ပါတယ်။
အဲ့ဒါကဘာတွေလဲဆိုတော့…

နှလုံးနှင့်သွေးကြောများဆိုင်ရာရောဂါ

သွေးဆုံးသွားတဲ့အမျိုးသမီးတွေဟာ ခန္ဓာကိုယ်ထဲမှာ အီစတိုဂျင်(estrogen)ဟော်မုန်းကျဆင်းလာကျတဲ့အတွက် နှလုံးရောဂါဖြစ်လာနိုင်ချေမြင့်တက်လာပါတယ်။ ကမ္ဘာတဝှန်း အမျိုးသမီး၊အမျိုးသား သေဆုံးရသည့်အကြောင်းရင်းများကို လေ့လာရသည့်အခါ နှလုံးရောဂါကြောင့်သေဆုံးနှုန်းက ပိုများပါတယ်။ ဒါကြောင့်မို့လို့ ပုံမှန်လေ့ကျင့်ခန်းလုပ်ပေးခြင်း၊ ကျန်းမာရေးနှင့် ညီညွတ်စွာနေထိုင်စားသောက်ခြင်း၊ ကိုယ်အလေးချိန်ထိန်းသိမ်းခြင်း စတာတွေကို လက်တွေ့လိုက်နာကြဖို့အရေးကြီးပါတယ်။ ပြီးတော့ မိမိနှလုံးကျန်းမာအောင်ဘယ်လိုနေရမလဲ၊ သွေးမတိုးအောင်၊ ကိုလက်စ်ထရော(cholesterol)ကျအောင် ဘယ်လိုနေရမလဲဆိုတာကို ကျန်းမာရေးစောင့်ရှောက်မှုပေးနေတဲ့ ဆရာဝန်များနှင့် အမြဲတိုင်ပင်ဆွေးနွေးကြဖို့လိုအပ်ပါတယ်။

အရိုးပွရောဂါ

အရိုးပွရောဂါကြောင့် အရိုးပါးလာပြီး၊ အရိုးသည်ပိုမိုကြွပ်ဆပ်လာကာ ကျိုးပဲ့လွယ်ပြီး အသေးစားထိခိုက်မှု ဖြစ်လျှင်ပင် ကျိုးလွယ်လာပါသည်။ အမျိုးသမီးများ သွေးဆုံးသွားပြီးနောက်၊အစပိုင်းနှစ်အနည်းငယ်အတွင်းမှာ အရိုးသိပ်သည်းဆများဆက်တိုက်ဆုံးရှုံးလာပြီး၊ အရိုးပွရောဂါ ဖြစ်လာနိုင်ချေ မြင့်တက်လာကြပါတယ်။ အရိုးပွရောဂါခံစားနေရသည့် သွေးဆုံးပြီးအမျိုးသမီးများ၏ တင်ပါးဆုံရိုး၊ကျောရိုး၊လက်ကောက်ဝတ်ရိုး တွေဟာ ကျိုးလွယ်လာကြပါတယ်။

ဆီးမထိန်းနိုင်ခြင်း

သွေးဆုံးပြီးနောက် အမျိုးသမီးတွေဟာ ဆီးလမ်းကြောင်းနဲ့ မျိုးပွားအင်္ဂါတဝိုက်မှာရှိတဲ့ ကြွက်သားတွေ ကျုံ့နိုင်၊ဆန့်နိုင်မှုအားနည်းလာကြတဲ့အတွက် ဆီးမကြာခဏသွားချင်ခြင်း၊ဆီးအရမ်းသွားချင်လာခြင်း၊ ဆီးထိန်းမရဘဲထွက်သွားခြင်း စသည်တို့ကို တွေ့ကြုံလာရတတ်ပါတယ်။ တခါတရံ ချောင်းဆိုးခြင်း၊ ရယ်မောခြင်း၊ အလေးမလိုက်ခြင်းတို့ကြောင့်ပင် ဆီးမထိန်းနိုင်ဘဲ ထွက်သွားကြပါတယ်။ ဆီးလမ်းကြောင်းထဲလည်းပိုးတွေဝင်လာနိုင်ပါတယ်။
ဆီးခုံတဝိုက်ရှိ တင်ပါးဆုံခွက်ကြွက်သားများအား Kegel exercise လို့ခေါ်တဲ့လေ့ကျင့်ခန်းလုပ်ပေးခြင်း၊ မိန်းမကိုယ်တွင် estrogen cream လိမ်းပေးခြင်း၊ စသည်တို့ကိုလုပ်ပေးခြင်းအားဖြင့် ဆီးမထိန်းနိုင်ခြင်းကို သက်သာစေပါတယ်။ သွေးဆုံးပြီးနောက် ဆီးလမ်းကြောင်းနှင့်မိန်းမကိုယ်ပြောင်းလဲလာခြင်း၊ နောက်ဆက်တွဲ ဆီးမထိန်းနိုင်ခြင်းတို့ကို ဟော်မုန်းဆိုင်ရာကုသမှုလည်း ဖြင့်လည်း ထိရောက်စွာ ကုသနိုင်ပါတယ်။

လိင်ပိုင်းဆိုင်ရာလုပ်ငန်းများအပေါ်ထိခိုက်မှုရှိလာခြင်း

မိန်းမကိုယ်မှ အစိုဓာတ်ထုတ်လုပ်နိုင်စွမ်းကျဆင်းလာခြင်း ကြောင့်အမျိုးသမီးအင်္ဂါသည် ခြောက်သွေ့လာကာ၊ကြွက်သားများလည်းအားနည်းလာမှုတို့ကြောင့် လိင်ဆက်ဆံပါက မသက်မသာခံစားရသလို၊ သွေးဆင်းလာတာမျိုးတွေ ကြုံတွေ့ရတတ်ပါတယ်။ လိင်မှုကိစ္စအပေါ်ခံစားမှုအာနည်းလာတာကြောင့် လိင်စိတ်ကုန်ခန်းလာတတ်ကြပါတယ်။

ကိုယ်အလေးချိန်တိုးလာခြင်း

အမျိုးသမီးတွေဟာ သွေးဆုံးချိန်ကာလအတွင်းနှင့် သွေးဆုံးပြီးချိန်ကာလတွေမှာ ကိုယ်တွင်းဇီဝဖြစ်စဉ်တွေ နှေးကွေးလာတာကြောင့် ကိုယ်အလေးချိန်တွေ တိုးလာပြီး ဝလာတတ်ကြပါတယ်။ အစားအစာကိုကျန်းမားရေးနှင့်ညီညွတ်စွာ သင့်တင့်ရုံစားသုံးပြီး၊ လေ့ကျင့်ခန်းမှန်မှန်လေးလုပ်သွားကာ မိမိရဲ့ကိုယ်အလေးချိန်ကို ထိန်းသိမ်းဖို့လိုပါတယ်။