ကိုယ်ဝန် ဘာကြောင့်ပျက်ကျတာလဲ?

Miscarriage (ကိုယ်ဝန်ပျက်ကျခြင်း)

ကိုယ်ဝန်သက်တမ်း ၂၀ပတ်(20 weeks) မတိုင်ခင် အကြောင်းတခုခုကြောင့် အလိုအလျောက်ကိုယ်ဝန်ဆုံရှုံးရခြင်းကို ကိုယ်ဝန်ပျက်သွားတယ်လို့ခေါ်ပါတယ်။ ကိုယ်ဝန်ရှိမှန်းသိထားသူများထဲမှ ၁၀-၂၀% ဟာအကြောင်းတခုခုကြောင့် ကိုယ်ဝန်ပျက်ကျနေရပါတယ်။ အဲ့ဒီရာခိုင်းနှုန်းထက်လည်း များနိုင်ပါတယ်။

မိမိကိုယ်တိုင် ဘဝတကွေ့မှာ ကိုယ်ဝန်ပျက်ကျဖူးခြင်းကိုကြုံတွေ့ရနိုင်ပြီး အဲ့ဒီအရာကို ရင်ဆိုင်ဖို့မလွယ်ကူလှပါဘူး။ ဘာအကြောင်းကြောင့် ကိုယ်ဝန်ပျက်ကျရတာလဲ၊ ဘယ်လိုအခြေအနေမျိုးတွေဆို ကိုယ်ဝန်ပျက်ကျနိုင်ခြေရှိလဲ၊ ဘယ်လိုကျန်းမာရေးစောင့်ရှောက်မှုတွေခံယူသင့်လဲဆိုတာတွေကို နားလည်သဘောပေါက်အောင် ကြိုးစားရင်း မတော်တဆ ကိုယ်ဝန်ပျက်ကျသွားပါက ဖြစ်ပေါ်လာမည့် စိတ်ခံစားမှုတွေကို လျော့ကျသက်သာစေနိုင်မှာပါ။

လက္ခဏာများ

ကိုယ်ဝန်ပျက်ကျပြီဆို ကိုယ်ဝန်သက်တမ်း ၁၂ပတ်(12 weeks) မတိုင်ခင် ပျက်တတ်ကြတယ်။
ဘယ်လိုလက္ခဏာတွေပြတတ်လဲဆိုတော့ …
မိန်းမကိုယ်မှသွေးဆင်းခြင်း၊သွေးစများတွေ့ခြင်း၊
မိန်းမကိုယ်မှ အရည်များ၊အသားစများဆင်းလာခြင်း၊
ဝမ်းဗိုက်နှင့် အောက်ကျောပြင်နေရာများတွင် နာကျင်ကိုက်ခဲခြင်း။
ဒါပေမယ့် တခုသိထားရမှာက ကိုယ်ဝန်ဆောင်ကာလ ပထမ(၃)လအတွင်း မိန်းမကိုယ်မှသွေးဆင်းခြင်း၊သွေးစများတွေ့ခြင်းတို့တွေ့ကြုံရပါကလည်း တချိူ့ကိုယ်ဝန်တွေဟာ အောင်မြင်စွာ မွေးဖွားလာနိုင်ပါသေးတယ်။

ကိုယ်ဝန်ပျက်ကျရသည့်အကြောင်းရင်းများ

မျိုးရိုးဗီဇဆိုင်ရာပြဿနာ
မျိုးရိုးဗီဇဆိုင်ရာ ချို့ယွင်းမှုကြောင့် သန္ဓေသားက ကောင်းစွာမဖွံ့ဖြိုးဘဲ ကိုယ်ဝန်ပျက်ကျသွားကြပါတယ်။
ကိုယ်ဝန်ပျက်ကြတာတော်တော်များများက မျိုးရိုးဗီဇဆိုင်ရာ ချို့ယွင်းမှုကြောင့်ပါ။

မိခင်၏ကျန်းမာရေးအခြေအနေ
တချို့ကိုယ်ဝန်တွေက မိခင်၏ကျန်းမာရေးအခြေအနေတွေကြောင့် ပျက်ကျသွားနိုင်ပါတယ်။
ကိုယ်ဝန်ပျက်ကျစေတဲ့ ကျန်းမာရေးအခြေအနေတွေကတော့…
သွေးတွင်းအချိုဓာတ်မထိန်းထားသော ဆီးချို၊
ရောဂါပိုးဝင်ရောက်ခြင်း၊
ဟော်မုန်းဆိုင်ရာပြဿနာများ၊
သားအိမ်ပုံမမှန်ခြင်း
စသည်တို့ ဖြစ်ပါတယ်။

ကိုယ်ဝန်ပျက်ကျနိုင်ခြေရှိသောအုပ်စု
အသက်အရွယ်
အသက်၃၅ နှစ်အထက်မှကိုယ်ဝန်ဆောင်သူတွေဟာ ငယ်ရွယ်သူတွေထက် ကိုယ်ဝန်ပျက်ကျနိုင်ချေ ပိုများပါတယ်။ အသက်ကြီးမှကိုယ်ဝန်ဆောင်လေ၊ ကိုယ်ဝန်ပျက်ကျနိုင်ချေမြင့်လာလေပါ။

ယခင်ကကိုယ်ဝန်ပျက်ကျဖူးခြင်း
နှစ်ကြိမ်(သို့) နှစ်ကြိမ်ထက်ပို၍ ဆက်တိုက် ကိုယ်ဝန်ပျက်ကျဖူးလျင် ထပ်မံ၍ ကိုယ်ဝန်ပျက်ကျနိုင်ချေပိုများပါတယ်။

နာတာရှည်ရောဂါ
သွေးတွင်းအချိုဓာတ်မထိန်းထားသော ဆီးချိုကဲ့သို့နာတာရှည် ရောဂါများရှိပါက ကိုယ်ဝန်ပျက်ကျနိုင်ချေပိုများပါတယ်။

သားအိမ်နှင့်သားအိမ်ခေါင်း ပြဿနာ
သားအိမ်ပုံမမှန်ခြင်း၊သားအိမ်ခေါင်းပွင့်နေတဲ့သူတွေက ကိုယ်ဝန်ပျက်ကျနိုင်ချေပိုများပါတယ်။

ဆေးလိပ်၊အရက်၊မူးယစ်ဆေးသုံးစွဲခြင်း
ဆေးလိပ်၊အရက်၊မူးယစ်ဆေးသုံးစွဲတဲ့ မိခင်တွေဟာ သာမန်မိခင်တွေထက် ကိုယ်ဝန်ပျက်ကျနိုင်ချေပိုများပါတယ်။

ကိုယ်အလေးချိန်
ဝလွန်းခြင်း၊ပိန်လွန်းခြင်းကြောင့်လည်း ကိုယ်ဝန်ပျက်ကျနိုင်ခြေပိုများပါတယ်။

ကိုယ်ဝန်ပျက်ကျခြင်းကိုဘယ်လိုကာကွယ်ကြမလဲ?

ကိုယ်ဝန်ပျက်ကျခြင်းကို ကာကွယ်ဖို့သင်ဘာမှမလုပ်နိုင်ပါဘူး။ ကိုယ်ဝန်ရှိလာပါက မိမိကျန်းမာရေးနှင့် ဗိုက်ထဲရှိ သန္ဓသားလေးကို ကျန်းမာရေးအတွက် ပိုမိုအလေးထားကာ

သားဖွားမီးယပ်ထံတွင် ကိုယ်ဝန်စောင့်ရှောက်မှုခံယူပါ။
ဆေးလိပ်၊အရက်၊မူးယစ်ဆေးဝါးကဲ့သို့ကိုယ်ဝန်ပျက်ကျစေနိုင်သည့် အရာများကို ရှောင်ကြဉ်ပါ။
နေ့စဉ်သောက်သုံးပေးရန်လိုအပ်သည့် Multivitamins အားဆေးများကို ပုံမှန်သောက်ပါ။
ကော်ဖီသောက်တာလျော့ပါ။ ကဖိန်းပါတဲ့အချိုရည်တွေ၊ကော်ဖီတွေ တစ်နေ့ကို နစ်ခွက်ထက် ပိုမို သာက်သုံးခြင်းက ကိုယ်ဝန်ပျက်ကျနိုင်ခြေပိုများခြင်းနဲ့ ဆက်စပ်နေတယ်လို့ မကြာသေးမီကတွေ့ရှိခဲ့တဲ့ လေ့လာမှုတစ်ခုက ဆိုထားပါတယ်။